Transcript D:\WP_docs\Galien Rethore\Galien_Rethore_lees_editie_01.wpd

De historie
van
Galien Rethore
Hier beghint die seer schoone wonderlijke historie van den
aldervromsten campioen Galyen Rethore met oock die
aldermeeste bloetstortinghe der Kerstenen ende der
heydenen, geschiet op den Ronchevale, doer die
verradereie vanden alder val[s]chsten
verrader Gouweloen.
[1]
[a2ra]
Den ghebenediden Coninck der gloryen ter eeren, die ons allen met
Sijn preciose dierbair heylich bloet ainder galgen des cruycen ghekocht
heeft ende verlost uuten handen des viants, wyl ick u vertellen een seer
scoone historie van den vromen Galien Rethore, die de sone was van
den stouten baroen Olyvier, grave van Viennoys, dye regnerende was
inder tijt dat die edele keyser Kaerle dye Groote domyneerde. Welcke
groote keyser Kairle gheloefde te versoecken dat Heylich Graf ons
[a2rb] Heeren Jhesu Cristi binnen Jherusalem. Om welcke sake de selve
keysere op een hoochtijt van Sinxenen ontbieden dede alle sijn
baroenen ende ghenooten van Vranckerijcke dat sy tot hem coemen
souden om hemlieden sinen wille te kinnen te ghevene. Ende als si alle
coemen ende versaemt waren ende hi open hof ghehouden hadde den
tijt van acht daghen bestont hy hem lien te segghen hoe hy
ghedelibereert was te versoecken dat Heylich Graf binnen Jherusalem,
segg[h]ende dat hy ware die alder rijcste, dye alder moghenste van alle
dander keysers ende conynghen die in dye heele werelt leveden.
Als sijn huysvrouwe dye keyserinne hoorde dat hi hem liet duncken
ende hem beromde te wesen die alderrijcste vander werelt berespte si
hem terstont, tot hem segghende datter noch een was veel rijcker dan
hi.
Ende die keyserre vraechde haer wie dat was.
“Sekerlijcken,” sprack de keyserinne, “dat es de coninck Huyghe van
Constantinoblen.”
Doen proponeerde hi dat hy int weder comen van Jherusalem
nemmermeer in Vranckerijcke keeren en soude voer dat hy den
coninck Huyghe binnen Constantinoblen versocht hadde.
Ende int wederom commen van die voernoemde reyse bynnen
Constantinoblen, daer de coninck Kaerle met sijn baroenen somighe
2
daghen toefde, sliep de grave Olivier by Jaquelinen, dis conincs
Huyghen dochter, daer hi Galien aen wan. Ende als Olyvier met
coninck Kaerle na Vranckerijcke ghereyst was, ende coninck Huyghe
vernam dat sijn dochter met kinde bevrucht was, verdreef hi haer uut
sijn hof.
3