Transcript Notizie pe stampe - Furlan

PROVINCIE DI UDIN
NOTIZIIS PE STAMPE
----------------------------------------------------------------------------------------------------- ai 14 di Novembar dal 2016
La ereditât di pre Checo, 30 agns dopo
Presentazion des iniziativis in ocasion dal trentenâl de muart. Vinars aes 10.30 li dal
liceu Stellini incuintri cui arlefs; aes 17 cerimonie a Montenârs
Il prossim vinars ai 18 di Novembar al cole il trentesim aniversari de muart di pre Checo
Placerean, figure tra chês plui impuartantis dal autonomisim furlan, personalitât centrâl
inte ricostruzion post taramot, intal moviment nassût pe istituzion de Universitât dal
Friûl e massime inte valorizazion de identitât furlane traviers la traduzion de Bibie par
furlan e la ideazion de “Fieste dal Friûl”, ai 3 di Avrîl. La Provincie di Udin insiemi cul
Comun di Montenârs, cul Istitût Ladin Furlan “Pre Checo Placerean”, cun Glesie Furlane,
cun “Patrie dal Friûl”, cul liceu classic Stellini (dulà che pre Checo al à insegnât), cu la
associazion “I Stelliniani” e in colaborazion cu la Societât Filologjiche Furlane e il Consei
regjonâl, e à organizât une serie di iniziativis par memoreâ chest grant om dal nestri
Friûl. Il program al previôt diviers moments di ricuart di pre Checo Placerean cun
riflessions su la atualitât dal so pinsîr. Dôs lis iniziativis pe zornade di vinars ai 18 di
Novembar: aes 10.30 li dal liceu Stellini (aula magna) e sarà ricuardade la figure dal
docent pre Checo cun diviersis testemoneancis ancje di ex arlêfs. A intervegnin al
incuintri il dirigjent Giuseppe Santoro, Gabriele Damiani (associazion Stelliniani), Pietro
Fontanini, Andrea Valcic, Remo Cacitti (president onorari di Glesie Furlane), Ivan
Cecchini, il professôr Stefano Perini. Aes 17 intal cimitieri di Montenârs, deposizion di
une corone su la tombe di pre Checo Placeran e po dopo (aes 18), inte glesie di Sante
Eline, sante messe celebrade dai predis di Glesie Furlane. Vinars ai 16 di Dicembar aes
17.30 intal salon dal Consei provinciâl, presentazion de ristampe “Un lenghe, un popol,
un glesie. La nestre storiis – scrits e discors di pre Checo Placerean”. “O vin volût
memoreâ cheste personalitât impuartante che e à difindût e valorizât il Friûl – al à dit il
president de Provincie di Udin Pietro Fontanini – intun moment dificil pe nestre tiere.
Une tiere che e je daûr a pierdi i siei simbui: prin tra ducj la Provincie di Udin, ent
aministratîf di riferiment che al deve fuarce a cheste idee di Friûl, sostituide di 10
Unions teritoriâls intercomunâls. Il risultât al sarà un Friûl slambrât dal pont di viste
aministratîf ma ancjemò di plui dal pont di viste identitari. Ve parcè che in chest
moment storic, caraterizât a fuart di un neocentralisim che al cres e al rinfuarce Triest
e Rome, o vin di rifleti su lis peraulis, sui pinsîrs di pre Checo Placerean che nus à
insegnât a crodi intal nestri teritori, inte nestre storie. Cjalant al nestri passât ma ancje
ai injustiziis patidis al continue a esortânus a “No vê pôre di vê coragjo”. E je ore che i
furlans tant che i scozês e i catalans a fasin sintî la lôr vôs”.
Ae presentazion a son intervignûts ancje Geremia Gomboso pal Istitût Ladin Furlan “Pre
Checo Placerean”, mons. Roberto Bertossi par Glesie Furlane, Claudio Sandruvi sindic di
Montenârs, Andrea Valcic par “La Patrie dal Friûl e Andrea Purinan pai Stelliniani cu la
prof.e Patti, vicepresidente de associazion.