Transcript Notizie pe stampe - FURLAN

PROVINCIE DI UDIN
NOTIZIIS PE STAMPE
----------------------------------------------------------------------------------------------------- ai 16 di Dicembar dal 2016
Pre Checo Placerean, un autonomist integrâl
Presentazion de ristampe "Une lenghe, un popul, une glesie. La nestre storie"
Si son sieradis cu la presentazion intal salon dal Consei provinciâl de ristampe de
publicazion “Un lenghe, un popul, un glesie. La nestre storiis”, lis manifestazions
dedicadis a pre Checo Placerean in ocasion dai 30 agns de sô muart. “O vin fat onôr a
chest grant om par fâ cognossi il so pinsîr, di grande atualitât ancje ae lûs dai risultâts
dal resint referendum– al à començât il president Pietro Fontanini -. Predi, inteletuâl,
autonomist al à dât tant al Friûl: al à lavorât par dâ dignitât a chest popul. Monumentâl,
in chest sens, la traduzion de bibie par furlan, che i à colaborât dopo pre Toni Beline”. E
propri rifantsi a pre Checo Placerean e pre Bepo Marchet, la Provincie di Udin e à fat un
apel “Par un Friûl plui furlan” domandant di sostignî la domande dal insegnament de
storie dal Friûl intes scuelis. Vincjecinc lis adesions rivadis al moment tra lis istituzions
locâls (Comuns di Udin e Pordenon), la universitât dal Friûl, Glesie Furlane, la Patrie dal
Friûl, la Societât Filologjiche Furlane, l'Ente Friuli nel Mondo, il prof. Gian Franco
D’Aronco, i Colonos, la Societât sientifiche furlane, la Kappa Vu (cjase editore), il prof.
Giancarlo Menis e diviers mieçs di informazion. “Benvignude cheste iniziative – al à
sotlineât Lorenzo Zanon president de Istitût Ladin Furlan Pre Checo Placeran -. Sperìn
che e permeti di recuperâ la storie dal Friûl e di fâle cognossi ai nestris zovins parcè che
dome cussì si pues difindi la nestre identitât”. Il sindic di Montenârs Claudio Sandruvi al
à puartât i salûts de comunitât di origjin di pre Checo Placerean dulà che ai 18 di
Novembar passât si è fate une cerimonie in sô memorie, tant partecipade. Bons. Roberto
Bertossi, president di Glesie Furlane segnant il profîl di pre Checo Placerean, lu à metût
insiemi cun pre Marchet, pre Toni Beline, pre Gjilbert Pressac tra i profetis che a àn
lassât une olme che e reste intai agns, stant che incidude intes animis e intes cussiencis
de int. “O volìn sperâ che no sedi finide la ete dai profetis pal Friûl – al à concludût -.
Dulà che al mancje il profete, il popul nol à un avignî. L'auguri al è che chestis
manifestazions a divulghin il spirt e il pinsîr di chescj oms par fâ nassi gnûfs profetis”. Il
professôr Gianfranco Ellero curadôr de publicazion e de golaine di studis sul
autonomisim de Istitût Ladin Furlan al à metût in lûs la personalitât complesse di pre
Checo “che no si pues ridusi a sprocs. Un autonomist integrâl, complet, alc di
straordenari, un grant poete soredut cuant che al fevelave di fede. Lui al è stât
autonomist no dome in sens politic e aministratîf, ma ancje in sens storic e soredut
eclesiâl, su la base dal teoreme: un lenghe, un popul, une glesie. Inte sô concezion,
l'autonomisim politic al jere dome la consecuence inevitabile de verifiche storiche di
chel principi: la lenghe e je la prove plui sigure de esistence di un popul, che al à dirit di
preâ inte sô lenghe intune sô glesie, e naturalmentri di aministrâsi in cjamp politic e
civîl”. Geremia Gomboso e Giorgio Jus a àn ricuardâ invezit la figure di pre Checo
Placereani tant che fondadôr dal Moviment Friûl. Un amôr contrastât chel cul Moviment,
un rapuart che si è ruvinât cuant che la sô creature e à assumût une conotazion politiche
a çampe. Pre Checo al è stât simpri coerent cul so obietîf iniziâl leât al Moviment: la
union cun chês altris fuarcis autonomistis dal Nord Italie. “Pre Checo al è stât leader, al
saveve cjalâ indenant tant che tant pôcs. Sperìn di meti in pratiche i siei insegnaments,
intal so non in chel che al à fat e dit”, al à zontât Gomboso. “Pre Checo al è ancjemò
presint, i siei insegnaments a son fuarts – al à concludût Fontanini -. Il Friûl al à bisugne
di chel che al à dit parcè che al da sperance al nestri popul a difindisi e a lâ indenant”.