Transcript Rapport emprema equipa campiunadi 3. Ligia CB Trun/Rabius 2:1

Rapport emprema equipa
campiunadi 3. Ligia
CB Trun/Rabius 2:1 FC Landquart
Emprema ga dau e schon gudignau
Partenza gartegiada en 3. Ligia. Il CB Trun/Rabius gudogna in giug uliv encunter
l’equipa da Landquart cun 2:1
Ei drova buc ditg tochen ch’il giug a Pustget vegn sin temperatura. Suenter gnanc treis
minutas setta Salvatore in culp liber ord biabein 20 meters ella petga. Denton ei era
l’equipa da Landquart naven dall’entschatta a cauld. Aschia sto Flavio schon baul ella
partida fa sia emprema parada.
Il giug ei ell’entira emprema mesadad ulivs cun in lev surpli da schanzas pil CB.
Suenter biabein 30 minutas astga Trun/Rabius lu festivar igl emprem gol en 3. ligia
dapi 12 onns. E tgei per in! Clau vegn giu sin la lingia da basa da prender en in pass
miez ault, el studegia buc grondas e setta il bal sc’in torpedo el vinchel dil cantun liung.
1:0 per T/R!
Landquart vegn ella 45avla aunc tier ina fetg buna caschun. Cun combas e tgaus
vegnan ils giugadurs dil CB denton da spindrar il bal sin lingia. Suenter quell’acziun
vai allura en cabina.
Per las secundas 45 minutas vegn Gian-Andrea niev el giug. E gest quei Gian-Andrea
vegn da sittar suenter ina bun’ura il proxim gol dalla partida. Suenter che Clau vegn
da dar in pass enamiez, vegn el d’alzar il bal cun ina excellenta segada sul goli da
Landquart ella reit.
Il secund gol da T/R fa denton vegnir neunavon ils hosps. Cun la gretta el venter
entscheiva l’equipa dil Signeradi numnadamein a surprender plaun plaunet la bitgetta
dil giug. Trun/Rabius vegn smaccaus ell’atgna mesadad e vegn mo sporadic dad ir en
cunterattaccas. Aschia vegni, sco ei vegn. Gian-Andrea ei 15 minutas avon la fin amiez
il plaz cul bal e sa buc tgei far cun el*. L’equipa da Landquart vegn vid il curom e cun
ina biala e sperta attacca vegnani da scursanir sin 2:1.
Las davosas minutas drovan lu gnarvas. Spel baun da reverva vegnan perfin in fan da
Trun/Rabius ed in fan da Landquart levet els cavels. Sil plaz emprova l’equipa culs
liblis turchis era aunc inaga tut. Il CB defenda denton bein, cumbatta e lai buc tier pli
grondas caschuns. Aschia ch’il giug va afin cun in 2:1 per l’equipa da casa.
Pia, ina partenza gartegiada e 3. ligia. Malgrad ch’igl ei aunc vegniu stretg enviers la
fin, ei la victoria meritada.
Proxima dumengia vai vinavon per il CB Trun/Rabius, quei puspei a casa. Hosp a
Pustget ei Cuera 97.
Salids Gian Carlo
*copyright Quotidiana
Trun, Pustget, 150 aspectatus
Gols: 1:0 Clau, 2:0 Gian-Andrea, 2:1 Landquart
CB Trun/Rabius: Flavio Candinas, Sven Tomaschett (Carlo Gautschi), Livio Janka,
Gion Andrea Nay, Sandro Orlik; Clau Berther, Thomas Bearth (Kevin Albin), Salvatore
Stagliano, Serafin Bundi; Ivo Albin, Patrizio Decurtins (Gian-Andrea Beer)
Reservas: Gian-Andrea Beer, Carlo Gautschi, Kevin Albin, Gian Carlo Candinas
Trenaders: Renzo Albin, Urs Gautschi