Transcript Messadi votaziun dil pievel revisiun parziala dalla

Messadi dil parlament communal per mauns dalla votaziun dil pievel dils 28-9-2014 :
Revisiun parziala dalla planisaziun locala Glion, areal Maissen
Stimadas vischinas, stimai vischins
Ils 16 da december 2013 ha il cussegl dil marcau digl anteriur marcau da Glion approbau il plan da quartier
«center staziun». El medem mument ha el relaschau ina zona da planisaziun pigl areal Maissen. Cul plan da
quartier approbau han ins fixau da maniera cumplessiva las premissas per l’avertura tenor planisaziun locala. Pil dutg existent ch’ei mess sut tiara sigl «areal Maissen» han ins stuiu relaschar ina zona da planisaziun.
Quei ei stau necessari per saver elaborar ina sligiaziun che corrispunda al niev dretg davart il schurmetg dallas auas. Cerca 90 meters el sid dalla via dil Glogn ei il dutg «Paradiesbächli» vegnius mess en bischels. La
lingia meina dapi decennis tras igl areal dil Center Mundaun, traversa la via cantunala, lu cun ina pendenza
da ca. 2% atras igl areal Maissen tochen tier il dutg che traversa la lingia dalla viafier en direcziun Pendas.
Sin basa da quellas premissas han ins elaborau in sboz per in niev decuors dil dutg.
In dutg aviert selai realisar sulettamein per liung la via Mulin. El contuorn dalla zona da pedunzs ch’ei planisada vegn la lingia existenta renovada cun ina pendenza minimala tochen ch’il dutg sa vegnir menaus el liber sin in livel da ca. 1 meter. El nord dalla basa nova dalla scarpa sto il dutg puspei vegnir menaus en in
bischel tochen tier la sbuccada pusseivla el Glogn sut la punt dalla viafier. Il sboz dil project ei vegnius optimaus en cunvegnientscha cugl uffeci cantunal per la natira e l’ambient. La part aviarta dil dutg sa vegnir
prolunghida empau. Visavi la Via Mulin duei vegnir dau adatg da setener vid ina distanza da 2 meters, quei
che lubess da formar il dutg da maniera natirala.
Il project vegn stipulaus cun ina revisiun parziala dil plan general d’avertura. El plan 1:1000 nr.
145_TREGEP14 spazi d’auas e dismessa 1.1000 vegnan definidas las parts dils conducts existents, talas
ch’ein planisadas e talas ch’ein da sligiar si. Pervia dallas novas relaziuns da possess sto per part era la lingia
dall’aua da plievgia ord il territori da baghegiar el vest vegnir spustada. Il spazi d’auas vegn garantius cun
lingias per la distanza dall’aua. La midada en ina zona dil spazi d’auas vegn prevedentamein realisada pér el
rom d’ina proxima revisiun pli cumplessiva dalla planisaziun locala dalla vischnaunca da Ilanz/Glion. Nua che
la formaziun naturala lubescha ei, vegn il spazi d’auas slargiaus ella media sin 14 meters. Quella limitaziun
d’utilisaziun succeda en cunvegnientscha cullas persunas cun dretg silla parcella da baghegiar. Lezzas prevedan d’integrar in toc dutg aviert e liber ella formaziun dil contuorn d’ina futura surbaghegiada. Sebasond
sin quella ulteriura determinaziun egl uorden fundamental ston l’utilisaziun da baghegiar lubida e la formaziun digl areal Maissen vegnir elaboradas en ina procedura supplementara. La revisiun parziala ei vegnida
tarmessa al cantun per l’examinaziun preliminara. La publicaziun davart la participaziun ei succedida dils 18
da fenadur tochen ils 18 d’uost 2014. Il parlament communal Ilanz/Glion ha tractau ed approbau la
fatschenta cun 23 :1 vuschs a caschun dalla sesida dils 27 d’uost 2014. Tenor artechel 48 dalla lescha davart
la planisaziun dil territori ein il relasch e la midada dalla lescha da baghegiar, dil plan da zonas, dils plans generals da formaziun e dils plans generals d’avertura da suttametter alla votaziun dil pievel.
Proposta:
Sebasond sillas explicaziuns precedentas proponan parlament e suprastonza communala da concluder la
revisiun parziala dalla planisaziun locala Glion, areal Maissen, per mauns dall’approbaziun cantunala. Tier ils
acts da conclus dalla revisiun parziala s’audan:
•
Revisiun parziala plan d’avertura general, 1:1000, nr. 145_TREGEP14
Dils acts ch’ein d’approbar san ins prender envesta tier l’administraziun communala duront il temps usitau
da lavur ni sin la pagina d’internet www.ilanz-glion.ch
Parlament communal
Carmelia Maissen, presidenta
Suprastonza communala
Aurelio Casanova, president communal