Proklematie Prins Naud de iësjte en Prinses Kirsten Ich, Prins Naud den iëstje, sinds kort wonende in de Jonkheer van de Maesensjtraot, zoon van Leon en Monique, lid van de fanfaar van Arensgenhout, organisator bie de Tent Sjteit, wirkend in de boew, mèt aan mien zie mien vriendin Kirsten, geboare in Sjömmert mer al langere tied ‘ne Beumerwalder, doordewaeks rechtensjtudent in Mesjtreech en same “Echte Loetsjers”. Biegesjtange door President Roger en de Wieze Road van Elf, make bie deze bekènd: Ten iësjte : Faeskes bouwe dat zit oos in ‘t blood, kommende carnaval zit dat mit oos dus waal good. Ten twiëde : Van jonks af aan zin v’r al mit gegange in de optochte, en höbbe noe lang genog gewach totdat veer op de Prinsewage mochte. Ten derde : Auch de sjpasskapel Nootgeval is neet aan mich veurbie gegange, dao hub ich väöl mit rondgehange. Ten veerde : Carnaval vilt dit jaor ‘n paar waeke later,houpelik höbbe v’r dan auch get minder las van wind en water. Ten viefde : Bie de fanfaar van Arensgenhout trèk ich mit de vaan d’r op oet, dit jaor hink bie oos de carnavalsvlag aan de boet. Ten zösde : Gemeinte Groat Nuth geit noe same met Sjènne en Onderbanke,‘t gereserveerde geld veur de verboewing van ’t Gemeinsjapshoes höb v’r doa aan te danke. Ten zevende : Dit jaor motte de Loetsjers ’t nao 11 jaor ins zonger oos doon, want veer sjtaon noe baove op de prinsewage “gans gewoon”. Ten achtste : De kunstgraasvelde ligke met sjtökskes autobeng bezeit, mer messjien is de “Derde hèlf” nog waal sjlechter veur de gezondheid. Ten neugende : Nao 11 joar haet de jonkheid de lètste den gepland, mit nuuj animo hilt dees traditie nog jaore sjtand. Ten tiënde : Noa de Chinees, de Käöl of de Albert Heijn, parkere in oos dörp is ech neet meer fijn. Ten èlfde: De tennisclub geit noe mit Nuth en Wienesroa ‘n bèlke houwe, mer die van Sjömmert wille zich doa gaer boete houwe. Oos motto veur deze carnaval is dan ouch: In de toekomst sjtaon nog veul dinger te gebeure, mèr mit oos es prinsepaar zal de carnaval d’r nog leuker op weure. Aldus gelaeze en gekald de zevende jannewari van ’t joar twiëdoezendenzeventeen

ALAAF ALAAF ALAAF