Transcript Toni Jacomet campiun Svizzer

Toni Jacomet ei campiun Svizzer
Victur d’in impurtont turnier da golf dall’Assoziaziun svizra da
golf seniors
DA PAUL DUFF ANR
L’Associaziun svizra da golf seniors ASGS meina mintg’onn atras ina
cumpetiziun da «single-matchplay» denter lur 2500 commembers ed
eruescha il victur da quei giug. Els finals dall’jamna vargada sil plaz da Golf
a Losone el Tessin ha Toni Jacomet, commember dil Club da golf Sedrun,
gudignau la trofea prestigiusa. El sa pia senumnar campiun svizzer dils
seniors ella categoria dil giug single-matchplay.
La via al success
Avon ch’igl ei vegniu aschi lunsch ha Jacomet stuiu giugar pliras rundas da
golf encunter ils megliers golfists seniors dalla regiun sid dalla Svizra nua
ch’ils clubs grischuns ein domiciliai. En quellas lutgas, giugadas um
encunter um, ha el perschuadiu cun in giug franc e constant ed ei
sequalificaus per il final dils victurs dallas quater regiuns dall’ASGS.
Gia avon tschun onns ei l’equipa dils seniors da Sedrun stada el final da quei
giug e Jacomet ha fatg part da quella. Cun sia franchezia e siu giug segirs ed
exacts ha el gliez onn menau ils da Sedrun medemamein alla victoria dil
final ed els ein stai campiun svizzer da scuadra. A Losone ha el lutgau
l’jamna vargada encunter treis giugadurs ch’ein classai meglier ch’el. Sia
fermezia ei stada la constanza regulara, l’exactadad da sias fridas ed ina
seconcentraziun sil giug naven dall’emprema tochen la pli davosa frida.
Respect e collegialitad enviers igl adversari
El giug nua che dus giugadurs dattan in encunter l’auter survegn quel che
drova sin la ruosna las pli paucas fridas in punct. Tier las ruosnas giugadas
pari dat ei negins puncts. Suenter las schotg ruosnas gudogna quel che ha ils
pli biars puncts. Las lutgas pretendan, sper in bien giugar, ina enorma
concentraziun e ferma gnarva. Suenter mintga ruosna sa il giugadur tgei
resultat ch’el ha. Ei igl adversari el plus ei l’auter necessitaus dad attacar
cun las fridas suandontas. Quei meina savens tier sbagls ed ulteriuras
sperditas da puncts. Il giug sa haver ina decisiun prematura. Sch’in
giugadur meina sin la quindischavla ruosna cun in avantatg da quater
puncts, sa l’auter buca pli egualisar sin las davosas treis ruosnas.
Ils giugs a Losone ein stai fetg ulivai e Jacomet ha decidiu els mintgamai pér
sin la davos ruosna. Il giug per il tierz rang ei aschizun vegnius decidius pér
suenter la biala e 24 ruosnas. La forza mentala ei perquei da
grond’impurtonza e decisiva. Gest quella fermezia ha Jacomet possediu e
menau ils finals gia dall’entschatta cun avantatg. In’ulteriura caussa ei stada
bein veseivla els finals. Il respect vicendeivels dils giugadurs ei curdaus en
egl. Malgrad la lutga in encunter l’auter ei l’amicabladad denter ils golfists
stada exemplarica. Alteraziuns e furias dat ei mo enviers sesez cura ch’ina
frida gartegia buc. Ina ferma zacra fa il giugadur plitost el zuppau e
seconcentrescha sin la cuntinuaziun dil giug.
Il sponsur principal dil turnier, il hotel Castello ad Ascona, ha dau treis dis
albiert als finalists. Il president dall’ASGS, Urs Bruhin , ha surdau il buccal al
victur. Il secund rang ei ius a Hans Sergej Spengler, Albino Bellini ei tierz
ed Yves Hofstetter quart. Las gratulaziuns per Toni Jacomet ein vegnidas
ladinamein suenter la victoria. Tuts amitgs pon cuir al simpatic senior quei
success. Il club da golf Sedrun selegra ensemen cul victur ed ei loschs
d’haver in campiun sco el en sias retschas.