Transcript Cärneval in Sassendonk 2017 - Zwolle

Cärneval in Sassendonk 2017
De plaatsing van ’t Eileuversnöst op de Grote Märkt
op vri’jdesaovens, as de officiële stärt van ’t
Sassendonks cärneval, döör e-k niks van mèèekrègen, maer saotesmiddes bin-k wè de stad deur
esjouwd umme naor de cärnevalsoptocht te kieken.
Zels bin-k absoluut gien cärnevalsvierder, maer ik
vinne ’t wel biezunder dät ter zovölle mensen bint die
compleet te sores van alle dag veur een antal daegen
kunnen vergèten.
Netuurlijk e-k de optocht wel
evolgd en van de verskillede waegens en groepen wel
foto’s emaakt, maer ik magge toch veurtal op de toeskouwers langes ’t
parcours letten. De meest vremde uutdossingen kom ie tegen en dit jöör za-j
ze in alle denkbaere kleuren wel aover straote gaon. De ien nog kleuriger of
gekker dan den ander.
En maer wachen lang de Assendörperstraote . . . strakkies naor ’t Wienuus.
A-j as butenstaonder dät zeugien ongeregeld bekieken, dan bi’j an de iene
kante bli’j, da-j döör niet bi’j euren, maer ander andere kante vin ie ’t ook een
bettien jammer da-j der gien duvel van begriepen dät de mensen döör
elemaole in op gaot.
Ik waere al op tied op de
Assendörperstraote en troffe döör de
verslaggèvers van rtv-ZOo as ook de
repörtagemakers van Sassendonk TV.
En dan kan ’t maer zo gebeuren dät
de iene de ander een interview
ofnemt.
Dät is dan zo’n moment dä-j gaot
denken dä-j ien verael twie keer
kunnen vertellen zonder em te
eralen.
Maer dan . . . al last ekrègen van kolde vingers . . de toeskouwers bint ter ook
wel is meer ewest . . ’t Zwols kwetiertien is ook als ruumskoots aoverskreden
. . . kump ter dan toch bewèging in de straote.
En kump de eerste ondstrouwe Eileuver, zoas elk jöör
veur de muziek uut, anfietsen.
Toe-egöven . . de optocht deur Sassendonk ma-j niet
vergelieken met die in Oldenzaal of Raolte maer der
is ter wel iene.
Elaas niet te völle meziekkörpsen allenig Van Limburg Stirum Band uut Wezep
kwamp veurop en ärgens alverwege a-j ook nog de Blaoskepel de anewakkers
uut Attem, maer veur de rest mossen wi’j ’t dit jöör met lewaaiwaegens
doen.
De gevolgen iervan
bint netuurlijk direkt
zichtbaer as de
collecte groep langes
kump . . . dät waeren
der een een antal
jören gelejen ook
völle meer.
Toen gaven ie nog lachend een piek veur de meziek, maer een euro veur ’t
cörso is in Zwolle wat vremd.
Naodät de reclamewaegen van de sponsoren is
passeert, kump ter ook een vremde allibaba op
zien vleigende tepijttien veurbij soezen.
En wäerachtig
jao . . ij lef nog . . ij lef nog . . ij lef nog . . Billy . .
en ik krege weer mooi weer toe-ewenst van de
Börgemeester Mooiweer
A-j dät zo beziet is ’t toch echt wel een optocht wöör ’t kiek mi’j is ge-alte
eel oge stiet. En zie-j de dames uut lapland an kommen sjokken en die ebt zo
te zien alle kraomen op de läppiesmärkt löög-etrökken.
En dan is ’t an mi’j dä-k netuurlijk lette op ’t gebruuk van dialect en of
sprèèktaal. Ik weten wel dät ter altied tegen aggeert wört, maer a-j der een
bettien op letten zie-j toch wel pogingen ’t op ien of andere meniere weer toe
te passen.
Zo is ter een groep uut Assendörp is een keertien op cursus Zwolse taal egaon
en of die ook met disse körre te maken ef is mi’j niet bekend maer Enk Jan
Meijer kan der zien licht opstèken.
Assendörp gien Led . . .
dan maer lampekappen-pret.
Maer toen ik een stellegien
Zwolse ofzetters wolle
fotogreferen wier ik inies
esnapt en ston ik zels in de
kiekert.
’t Zal dan wel weer iene
wèèn die mi’j erkennen al
e-k zels niet idee wie ’t is.
’t Zal toch zeker niet wèèn um mien cärnevaleske uuterlijk . . . die kop kan ik
now ienmaol niet ofzetten en ik ebbe ’t ter maer met te doen.
OK.. ’t is cärneval en der
kump een drie-een-eid
veurbij, die veur zoverre
ik kan beoordelen niks
met vader, zönne of
eilige geest ef te maken.
Maer
a-j
iermèè
strakkies ook nog de
tente in wilt lopen . . .
Ook is een toenemmen van zo-enuumde loopgroepen opvallend en die maken
elke optocht met aoverdrèven kleurgebruuk angenamer umme naor te kieken.
En met de weersumstandig-eden adden de personen van TisNix ’t wel goed
veur mekaere en ’t zekers niet zo kold as de kinder van De Vlieger die aose
blauw zagen van de kolde.
Die Katholiek basisskoele is al jörenlank opvallend anwezig in de Zwolse
Cärnevalsoptocht en ook met meerdere kreasies. Was de iene groep in de
wolken . . . zöt de andere luchtballonnen vliegen.
Maer ook onder de loopgrupies ef de medärne mechanisasie zien intrede
edaon . . .
. . en mut alles wel op rullegies gaon.
Tussen al die individuen die ter met lopen denk ie bi’j de iene . . . döör wi’j toch
niet bi’j euren ! . . .
Bi’j een ander . . . verrek . . .
wie is dät ook al weer ?
Of rennen de camera veurbi’j
in de ope dä-j ze niet ziet.
En soms lopen der personen met wöörvan ik ’t idee ebbe . . . unnie kunt zo bi’j
Pliesie Iesselland solliciteren as reseseur.
Undercover of onder-koffer . . . mooi edaon!
De dames adden an ’t ende in de Luttekestraote zels de zweilichies an.
Dit jöör a-j ook een stellegien zeikers in de optocht mèèlopen die met ärd
blaozen van zich wollen laoten euren, maer dät kon de pret niet drukken.
Een grupien wat raere chinezen stakken der gewoon de draak met.
En die adden der ook nog skik van ook.
Tussen de vremde groep van kleurige kwallen ondekken ik ter iene die zichzels
veurstellen as de grootste kwal . . . .
elaas ef die klooi-annes an de andere kante van
de oceaan der gien weet van . .
ie zollen willen dät die zichzels stak.
een engel e-k liever dan een engerd.
Toch waere ik wel bli’j dät moeders de vrouwe niet mèè is egaon kieken.
Dan was zi’j miskien ook nog op ’t idee ekommen wat ter nog meer met
theezakkies kan wörren edaon . . .
. . . ik mutte der niet an denken.
En al plagiesskietend kump de ele stoet an mee veurbi’j en laot ik veur ’t
veraeltien de waegens der prinsen, prinsessen en adjudanten met al die veren
op de kop, die inies verklören wöorumme die fazanten zo’n kolde konte ebben,
veur wat ’t is.
Tötdät die waegen van de Cärnevals Vereniging De Oelewappers veurbi’j kömp
. . . ja maer wach is effen . . . ik wete dät ter een antal oelewappers bint die
mien veraelteis lèzen . . . maer now zie-k inies een kladde görenklössies.
Oeps . . . oe zit dät dan ?
Wat mi’j betreft mag Prins Cärneval de kommende dagen zien gank gaon as ij
de slöttel van de stad maer weer op tied wil inlèveren.
En op 15 meert maggen wi’j zelf weer andere malloten kiezen veur de
poppekaste die ze in Den Aag opvoeren.
Kiek van cärnevalsgasten weet ie dä-j der niks van oeven te verwachen, maer
de medärne volksvertegenwoordigers? As dät stellegien malloten in optocht
zollen lopen, as was ’t de verkiezingskaravaan . . . dan wol ik ter nog gien foto
van maken.
27 februwaeri 2017
Görendrögien W.
Kleine impressie: Cärnevalsoptocht - Sassendonk 2017
Kleurriek Sassendonk
wat een allemachtige kladde volk . . . en allemaole kieken.
En zullie die graag op de foto wollen.
Kriegen ’t veraeltien ook.